Rusiya-Ukrayna müharibəsində bir ilk: Rus əsgərlər rus əsgərləri əsir götürdü

Ötən gün Telegram sosial media platformasında paylaşılan videoda bir detal diqqət çəkib. Bölgədəki Ukraynayönlü rus əsgərlərindən ibarət Rusiya Könüllü Dəstəsi (RVC) Moskva adına döyüşən rus əsgərlərini zərərsizləşdirərək əsir götürdüklərini açıqlayıb.

Busaat.az Sozcu qəzetinə istinadən xəbər verir ki, paylaşılan görüntülərdə silahlı rus əsgərlərinin Rusiya əsgərlərin yanında poza verdiyi görünür. Kiyevə sədaqətini nümayiş etdirən qrup, Belqorod bölgəsindəki əməliyyatda rus əsgərlərini əsir götürdüklərini açıqlayıb.

“Bu ruslar öz iradələrinə zidd olaraq müharibəyə sürükləniblər”, – bəyanatda deyilir: “Onlar tezliklə Putinin yaratdığı ədalətsizliyi və biabırçılığı anlayacaqlar”.

Verilən açıqlamaları və görüntüləri dəyərləndirən ekspertlər ilk dəfə rus əsgərlərinin Rusiya torpaqlarında əsir düşdüyünü bildirib. Bəyanatda neçə rus əsgərinin əsir götürüldüyü açıqlanmasa da, bu şəxslərin Ukrayna hakimiyyətinə təhvil veriləcəyi, daha sonra isə bu rus əsgərlərinin əsir mübadiləsində istifadə ediləcəyi bildirilib.

Ukraynayönlü RVC və Azad Rus Legionu qrupları son həftələrdə çoxlu sayda rus əsgərini əsir götürərək transsərhəd əməliyyatlar keçirib.

Busaat.az