Rusiya və İran nüvə sazişinin bərpası və ikitərəfli əməkdaşlığı müzakirə edib

 Rusiya Xarici İşlər nazirinin müavini Sergey Verşinin İrana səfər edib. İranın nüvə sazişinin bərpası, Yaxın Şərqdəki böhranların həlli və ikitərəfli əməkdaşlıq məsələləri Verşinin ilə İranın Xarici İşlər naziri Hüseyn Əmir Abdullahyan arasında danışıqların əsas mövzusu olub.

Busaat.az xəbər verir ki, bu barədə məlumatı Rusiya Xarici İşlər Nazirliyi yayıb.

Danışıqlar BMT Nizamnaməsinin Müdafiəsi üzrə Dostlar Qrupunun milli əlaqələndiricilərinin noyabrın 5-6-da Tehranda keçirilən birinci iclası çərçivəsində aparılıb.

“Tərəflər BMT Təhlükəsizlik Şurasının və Baş Assambleyanın gündəliyində duran qarşılıqlı maraq doğuran beynəlxalq və regional məsələlər ətrafında fikir mübadiləsi aparıblar. Birgə Hərtərəfli Fəaliyyət Planının bərpası, Əfqanıstanda, Yəməndə, Suriyada və Liviyada münaqişələrin uzunmüddətli nizamlanmasına nail olunması vəzifələrinə xüsusi diqqət yetirilib” – deyə, Rusiya XİN bildirib.

“Hər iki tərəf müntəzəm koordinasiyanın davam etdirilməsinin vacibliyini qeyd edib və ikitərəfli əlaqələrin daha da gücləndirilməsinə sadiqliyini bir daha bəyan edib” – deyə, məlumatda əlavə edilib.

Busaat.az