Rusiya xarici işlər nazirlərinin üçtərəfli görüşünü təşkil etməyə hazırdır - Rusiya XİN

İyulun 17-də Rusiya  xarici işlər nazirinin müavini Andrey Rudenko Azərbaycanın Rusiyadakı fövqəladə və səlahiyyətli səfiri Polad Bülbüloğlu ilə görüşüb.

Busaat.az xəbər verir ki, bu barədə Rusiya Xarici İşlər Nazirliyinin saytında yerləşdirilən məlumatda bildirilir.

Görüş zamanı Cənubi Qafqazdakı vəziyyət, Bakı ilə İrəvan arasında barışıq prosesi müzakirə olunub. Rusiya tərəfi 9 noyabr 2020-ci il tarixli üçtərəfli bəyanata uyğun olaraq Laçın dəhlizinin açılmasının və  hər iki istiqamətdə nəqliyyat əlaqələrinin bərpasının, eləcə də normal şəraitin yaradılmasının zəruriliyini qeyd edib.

İyulun 15-də Azərbaycan Xarici İşlər Nazirliyinin bəyanatına gəlincə, qeyd olunub ki, Rusiya Azərbaycanın ərazi bütövlüyünə hər zaman hörmətlə yanaşır və bu öhdəliklərə tam sadiqdir.

Rusiya tərəfi sazişlərin ən yüksək səviyyədə həyata keçirilməsi yollarını, o cümlədən sülh müqaviləsi üzrə razılaşma məsələsini müzakirə etmək üçün yaxın vaxtlarda Moskvada xarici işlər nazirlərinin üçtərəfli görüşünü təşkil etməyə hazır olduğunu təsdiqləyib.

Görüş qarşılıqlı hörmət və konstruktiv atmosferdə keçib”, – Rusiya XİN-in bəyanatında deyilir.

Busaat.az