Rusiyanın müdafiə naziri Sergey Şoyqu ölkəsi ilə Çin arasında münasibətlərin “görünməmiş” yüksək səviyyəyə çatdığını bildirib.
Busaat.az xəbər verir ki, Rusiya Müdafiə Nazirliyindən verilən məlumata görə, Şoyqu Çin Müdafiə Nazirliyinə təyin edilən Li Şanfu və müavini vəzifəsinə təyin edilmiş Çin Xalq Azadlıq Ordusunun generalı Canq Yuşia və general Hi Veydongu təbrik edib. Şoyqu həmkarlarına teleqram göndərib.
Rusiya və Çinin ortaq sərhəd və tarixə malik olduğu bildirilən təbrik mesajlarında aşağıdakı ifadələr yer alıb:
“Rusiya və Çin köhnə dostlar və tərəfdaşlardır. Ümumi sərhəd, tarix və çoxillik dostluq xalqlarımızı və ölkələrimizi möhkəm bağlayıb. İkitərəfli münasibətlər görünməmiş yüksək səviyyəyə çatıb və dünyada geosiyasi gərginliyin artması fonunda qlobal sabitliyin möhkəm tərəfdarlarına çevrilib”.
Şoyqu iki ölkə arasında hərbi texnologiya sahəsində əməkdaşlığın bundan sonra da inkişaf edəcəyinə ümid etdiyini bildirib.
