Rusiyadan verilən açıqlamada Türkiyə-Suriya münasibətlərinə dair görüşün iyunun 21-də Astanada keçiriləcəyi bildirilib.
Busaat.az xəbər verir ki, Rusiya prezidenti Vladimir Putinin Yaxın Şərq və Afrika ölkələri üzrə xüsusi nümayəndəsi və xarici işlər nazirinin müavini Mixail Boqdanov Türkiyə, Suriya, Rusiya və İran xarici işlər nazirlərinin müavinlərinin iyunun 21-də Qazaxıstanın paytaxtı Astanada görüşəcəyini bildirib.
Jurnalistlərə açıqlama verən Boqdanov Türkiyə, Suriya, İran və Rusiya xarici işlər nazirlərinin müavinlərinin iyunun 21-də Astanada görüşünün keçiriləcəyi, Rusiya nümayəndə heyətinin isə münasibətlərin normallaşması üçün iyunun 20-21-də Astanaya gedəcəyi barədə məlumatı paylaşıb.
Boqdanov deyib: “Rusiyanın yol xəritəsindəki layihəsi hazırdır. Bizim vəzifəmiz tərəfdaşlarımızla məsləhətləşmək və bu işi irəli aparmaqdır. Ümid edirəm ki, Astanada danışıqlarda ciddi irəliləyiş əldə edəcəyik”.
Qeyd edək ki, Türkiyə, Rusiya, İran və Suriya xarici işlər nazirləri mayın 10-da Rusiyanın paytaxtı Moskvada görüşüblər.
Görüşdən sonra Türkiyə-Suriya əlaqələrinin inkişafı üçün yol xəritəsinin hazırlanması qərara alınıb. Yol xəritəsinin hazırlanması və prosesin mərhələli şəkildə davam etdirilməsi üçün müvafiq qurum kimi xarici işlər nazirlərinin müavinlərinin, Müdafiə və Kəşfiyyat Nazirliyinin iştirakı ilə 4 nəfərdən ibarət komitənin yaradılması qərara alınıb.
Busaat.az
