Rusiyanın Danimarkadakı səfirliyi işçilərinin sayının ixtisar edilməsi ilə əlaqədar bütün konsulluq məsələləri ilə bağlı müraciət və ya sənədlərin qəbulunu dayandıracaq.
Busaat.az TASS-a istinadən xəbər verir ki, bu barədə Rusiya Xarici İşlər Nazirliyinin Telegram kanalında bildirilib.
Qeyd edək ki, Danimarka Rusiyanın Kopenhagendəki səfirliyindəki rus diplomatlarının sayını 15-dən 5-ə endirmək, onların sayını Danimarkanın Moskvadakı diplomatik nümayəndəliyindəki Danimarka işçilərinin sayına uyğunlaşdırmaq qərarına gəlib. Rusiya Xarici İşlər Nazirliyi bu addımı Danimarkanın növbəti düşmən qərarı kimi qiymətləndirib.
Nazirlik Rusiyanın Kopenhagendəki səfirliyinə istinadən xəbər verir ki, Danimarka hakimiyyətinin misli görünməmiş qərarından sonra Rusiyanın Danimarkadakı səfirliyinin konsulluq şöbəsi fəaliyyətini dayandırmalı olacaq.
Bəyanatda deyilir ki, hazırda Rusiya vətəndaşlarına konsulluq xidmətlərinin göstərilməsi üçün iş aparılır.
Bu arada, pasportların, vizaların, sorğuların, arayışların və digər sənədlərin verilməsi 25 sentyabr 2023-cü il tarixinədək davam edəcək və əvvəllər verilmiş bütün müraciətlərə baxılacaq.
