Rusiyaya birbaşa uçuşlar bərpa olunarsa... - ABŞ Gürcüstana XƏBƏRDARLIQ ETDİ

ABŞ Dövlət Departamenti rəsmi Tbilisiyə Rusiya ilə Gürcüstan arasında birbaşa uçuşların bərpa olunacağı təqdirdə mümkün sanksiyalarla bağlı xəbərdarlıq edib.

Busaat.az xəbər verir ki, bu barədə Dövlət Departamentinin Gürcüstandakı “Accent” nəşrinə şərhində bildirilir.

“Qərb ölkələri, o cümlədən ABŞ Rusiya təyyarələrinin öz hava məkanını keçməsinə qadağa qoyur. Əgər Rusiya ilə Gürcüstan arasında birbaşa uçuşlar bərpa olunarsa, bu, Gürcüstan aviaşirkətlərinə qarşı sanksiyaların mümkünlüyü ilə əlaqədar bizim narahatlığımıza səbəb olacaq”, – Dövlət Departamenti bildirib.

Vaşinqton hesab edir ki, Gürcüstanın Rusiya ilə münasibətlərini dərinləşdirməyin vaxtı deyil.

Qeyd edək ki, Rusiya mayın 10-da Gürcüstan vətəndaşları üçün 2000-ci ildən qüvvədə olan viza rejimini ləğv edib.

Busaat.az