Sberbank sanksiyalar səbəbindən BƏƏ-dəki ofisini bağlayacaq

Sberbank sanksiyalara görə Birləşmiş Ərəb Əmirliklərindəki (BƏƏ) ofislərini bağlayacaq.

Busaat.az xəbər verir ki, bunu Rusiyanın ən böyük bankı olan Sberbank-ın İdarə Heyəti sədrinin birinci müavini Aleksandr Vedyahin deyib.

Paytaxt Moskvada jurnalistlərə açıqlama verən Vedyahin, Sberbank-ın Abu Dabidəki ofisində ciddi məhdudiyyətlər yaşadıqlarını söyləyib.

Bu səbəbdən BƏƏ-dəki ofislərini bağlamaq qərarına gəldiklərini izah edən Vedyahin qeyd edib: “2023-cü ilin ilk rübündə BƏƏ-dəki ofisimizi bağlamaq məcburiyyətində qalacağımız üçün təəssüf edirik. Bununla belə, ofisimizi bağladıqdan sonra BƏƏ bazarındakı müştərilərə kömək etməyə davam edəcəyik”.

Vedyahin əlavə edib ki, 2023-cü ilin sonuna qədər Çində filial açmağa ümid edirlər.

Təxminən 110 milyon müştərisi ilə Rusiyanın ən böyük bankı olan Sberbank, ABŞ və Avropa İttifaqının sanksiyalarına məruz qalan Rusiya bankları arasındadır.

Busaat.az