Stoltenberq tanklarla bağlı müzakirələr üçün Almaniya MN ilə görüşəcək
NATO-nun baş katibi Yens Stoltenberq yanvarın 24-də Berlində Almaniya Müdafiə Nazirliyinin rəhbəri Boris Pistorius ilə görüşəcək.
Busaat.az xəbər verir ki, bu barədə məlumatı alyansın mətbuat xidməti yayıb.
Görüş Ukraynaya tank tədarükünün müzakirəsi fonunda baş tutacaq. Görüşdən sonra Pistorius və Stoltenberq mətbuata açıqlama verəcəklər.
Yanvarın 20-də 50-yə yaxın ölkənin müdafiə nazirləri Kiyevə gələcək hərbi yardımı müzakirə etmək üçün Almaniyadakı ABŞ-a aid Ramşteyn aviabazasında görüşüblər. İclasdan sonra Almaniyanın müdafiə naziri Boris Pistorius Ukraynanın tələb etdiyi Alman “Leopard 2” tanklarının çatdırılması ilə bağlı hələlik heç bir qərar vermədiklərini açıqlayıb.
Daha sonra, yanvarın 22-də Almaniyanın xarici işlər naziri Annalena Baerbok bildirib ki, Polşa Ukraynaya Leopard tankları tədarük etsə, AFR etiraz etməyəcək. Polşa tərəfi cavabında deyib ki, müvafiq bəyanatı Almaniya kansleri Olaf Şolz təkrar etməlidir.
