Şuşa Bəyannaməsi: Türkiyə Azərbaycanda hərbi baza formalaşdırır? – ŞƏRH

“Türkiyənin Azərbaycanda – Qarabağda formalaşdıracağı hərbi bazalar məmləkətimizin təhlükəsizlik təminatını daha da möhkəmləndirəcək”. Busaat.az xəbər verir ki, bu fikirləri iyunun 15-də Türkiyə prezidenti Rəcəb Tayyib Ərdoğanla İlham Əliyevin Şuşada imzaladığı Bəyannamənin detallarını şərh edən politoloq Elxan Şahinoğlu səsləndirib. Politoloq qeyd edib ki, Şuşa Bəyannaməsi ilə Türkiyənin Azərbaycanda hərbi baza formalaşdırlmasının önü açılıb: “Tarixi Şuşa bəyannaməsi Azərbaycanın, o cümlədən Qarabağın təhlükəsizliyini Türkiyənin təminatı altına almış oldu. Bu erməni separatizminə və onun havadarlarına ciddi xəbərdarlıq mahiyyəti daşıyır. Qarabağın istənilən məntəqəsinə hücum edib işğal etmək istəyən qüvvə bundan sonra Azərbaycanla yanaşı, qarşısında Türkiyəni də görəcək. Türkiyənin Azərbaycanda – Qarabağda formalaşdıracağı hərbi bazalar məmləkətimizin təhlükəsizlik təminatını daha da möhkəmləndirəcək. Türkiyənin Şuşada açacağı baş konsulluğu tarixi şəhərimizin təhlükəsizliyinə faydası olacaq. İndi Türkiyə ilə Qarabağdakı birgə fəaliyyətimizi o nöqtəyə gətirməliyik ki, 5 ildən sonra bölgədə rusiyalı hərbçilər də qalmasın. Düzdür, bəyyanamənin heç bir yerində “hərbi baza” ifadəsi yoxdur, ancaq Azərbaycanın və Qarabağın Türkiyənin təhlükəsizliyinin təminatı üçün ayrı hansı alətdən istifadə etmək olar? Hərbi bazalar mövzusunu cəmiyyət olaraq gündəmdə saxlamalıyıq ki, bu məsələ də reallaşsın və rusiyameylli güclər bizə mane ola bilməsinlər. Şuşa azad olunandan dərhal sonra “Şuşada Türkiyənin konsulluq binasının olması vacibdir” fikrimi də qəribçiliyə salanlar və inanmayanlar var idi. Oldu, hərbi bazalar da olacaq”.