Taliban qüvvələri İran sərhədindəki Nimruz vilayətində ağır silahlardan istifadə edərək hərbi təlimlər keçirib.
Busaat.az xəbər verir ki, Talibana bağlı xəbər agentliyi Bakhtar-a danışan Nimruzdakı 3-cü Batalyonun komandiri Məhəmməd Nəbi Molla Vurur mərkəzi Zəranc rayonunda keçirilən hərbi təlim haqqında məlumat verib.
Nəbi Talibana yeni təcrübələr qazandırmaq üçün müxtəlif ağır silahlardan istifadə edərək peşəkar təlimçilərin köməyi ilə hərbi təlimlər keçirdiklərini bildirib.
Xatırladaq ki, 2021-ci ilin avqustunda Əfqanıstanda iqtidarı ələ aldıqdan sonra Taliban qüvvələri ilə Pakistan və İranın sərhəd qüvvələri vaxtaşırı silahlı qarşıdurmalar yaşayır.
Sonuncu dəfə mayın 27-də Nimruz sərhəddində Taliban və İran sərhəd qüvvələri arasında silahlı qarşıdurma yaşanmış, 2 İran əsgəri və 1 Taliban üzvü həyatını itirmişdi.
Tərəflər bir-birini münaqişənin başlamasında ittiham etsə də, danışıqlar nəticəsində gərginliyə son qoyulub.
Taliban və İran arasında ara-sıra sərhəd münaqişəsindən başqa, hər iki tərəf Hilmend çayında suyun paylaşılması ilə bağlı da gərginlik yaşayır.
Busaat.az
