Taliban qızların təhsilini qadağan edən qərarı müdafiə edir

Taliban administrasiyasının ali təhsil sahəsində gətirdiyi qaydalar lazımınca yerinə yetirilməyib. Ona görə də mövcud qadağa tətbiq edilib.

Busaat.az xəbər verir ki, bunu Taliban tərəfindən təyin olunan ali təhsil nazirinin müavini Nida Məhəmməd Nedim Əfqanıstan Dövlət Televiziyasında yayımlanan proqramda deyib.

Nedim qeyd edib: “Universitetlərdə qızların hicab qaydalarına əməl etmədiyini, qadağaya baxmayaraq, bəzi universitetlərdə birgə təhsilin hələ də davam etdiyini, qız tələbələrin universitet təhsili üçün müxtəlif vilayətlərə getməsinin və orada yaşamasının uyğun olmadığını gördük. Buna görə də universitetlərin bəzi şöbələrində qızların təhsil almaması lazımdır”.

Kənd təsərrüfatı, mühəndislik kimi bəzi şöbələrdə qızların təhsil almasının “İslam qaydalarına və əfqan namusuna zidd” olduğunu iddia edən Nedim əlavə edib: “Məqsədimiz qızları təhsildən məhrum etmək deyil. Universitetlərdəki problemlərin həlli istiqamətində işlər davam etdirilir”.

Beynəlxalq reaksiyalara “daxili işlərimizə qarışmasınlar” şəklində cavab verən Nedim, qız və oğlanların təhsil aldığı mədrəsələrlə bağlı yeni qərarın gündəmdə olmadığını, mədrəsələrin fəaliyyətini indiki formada davam etdirəcəyini bildirib.

Qeyd edək ki, Taliban administrasiyası ötən gün universitetlərdə qız tələbələrin təhsilinin ikinci elana qədər dayandırıldığını açıqlayıb.