Taliban rəsmiləri öz kitabında Əfqanıstanda hərbi xidməti zamanı 25 nəfəri qətlə yetirdiyini və bundan utanmadığını yazan Susseks hersoqu şahzadə Harriyə reaksiya verib.
Busaat.az xəbər verir ki, bu barədə Taliban müvəqqəti hökumətinin sözçüsü Abdulkahar Belhi məlumat verib.
“Şahzadə Harrinin bu etirafları günahsız insanları ehtiyatsızlıqdan qətlə yetirən işğalçı qüvvələrin əfqan xalqında səbəb olduğu travmanın kiçik bir nümunəsidir” – deyə, Taliban rəsmiləri qeyd edib.
Talibanın sözçüsü Bilal Kərimi Twitter hesabından verdiyi açıqlamada əfqanların “işğal cinayətlərini” unutmayacağını bildirib: “Belə cinayətlər təkcə bir ölkə ilə məhdudlaşmır. Əfqanıstana hücum edən hər ölkənin oxşar hekayələri var”.
Talibanın aparıcı komponentlərindən olan Haqqani Qrupunun liderlərindən Enes Haqqani də Twitter hesabından mövzu ilə bağlı açıqlama verib.
Şahzadə Harrinin Əfqanıstanda 25 nəfərin öldürülməsini “şahmat fiqurlarını taxtadan çıxarmaq” kimi görməsinə reaksiya verən Haqqani deyib: “Bu müharibədə məğlub oldunuz. Öldürdüyünüz insanlar şahmat fiqurları deyildi. Onlar insan idilər”.
Qeyd edək ki, Britaniya kral ailəsindən ayrılaraq ABŞ-da məskunlaşan Harri yanvarın 10-da nəşr olunacaq “Ehtiyat” adlı kitabında Əfqanıstanda hərbi xidmətdə olarkən 25 əfqanı öldürdüyünü və buna görə “utanmadığını” bildirib.
Busaat.az
