Tarixi İsgəndəriyyə şəhəri qlobal istiləşmə səbəbindən su altında qalacaq - "Əl Ahram"

 Misirin ikinci böyük şəhəri olan İsgəndəriyyə və şəhərdəki limanın əhəmiyyətli bir hissəsinin qlobal istiləşmə səbəbindən yaxın illərdə su altında qala biləcəyi proqnozlaşdırılır.

Busaat.az xəbər verir ki, bu barədə Misirin “Əl Ahram” qəzeti iddia ilə çıxış edib.

Qəzetin məlumatına görə, ölkənin ən böyük limanına sahib olan İsgəndəriyyənin yüksələn dəniz suları altında qala biləcəyi haqqında xəbərdarlıq edilib.

Birləşmiş Millətlər Təşkilatının İqlim Dəyişikliyi üzrə Hökumətlərarası Panelinin (IPCC) məlumatlarına diqqət çəkilərək, 2050-ci ilə qədər İsgəndəriyyənin üçdə birinin su altında qalacağı bildirilib.

Buna əsasən, 6 milyon əhalisi olan şəhərdən 1 milyon 500 min insanın köç etməli olacağı, şəhərdəki qədim əsərlər və tarixi abidələrin də böyük təhlükə ilə üzləşəcəyi qeyd edilib.

Xəbərdə İsgəndəriyyədə dəniz sahilinin hər il 3 millimetr yüksəldiyi və qarşıdakı 30 ildə Aralıq dənizi sularının bir metr yüksələ biləcəyi proqnozlaşdırılıb.

İqlim mütəxəssisləri Nil Deltası ətrafındakı münbit torpaqların üçdə birinin dəniz səviyyəsinin artımı səbəbindən yararsız hala düşəcəyini bildirib.

Busaat.az