Təhdidlərə və sanksiyalara baxmayaraq, nüvə məqsədlərimizə doğru irəliləyirik - İran

“İran çətin şəraitdə və düşmənlərin davamlı təhdid və sanksiyaları şəraitində “mürəkkəb” nüvə texnologiyalarını inkişaf etdirir”.

Busaat.az xəbər verir ki, bunu İranın Atom Enerjisi Agentliyinin rəhbəri Məhəmməd İslami deyib.

İranın Atom Enerjisi Agentliyinin rəhbəri Məhəmməd İslami İranın dövlət radiosu Radio Goftogoo-ya açıqlama verib.

Məhəmməd İslami vurğulayıb ki, iranlı gənclər və alimlər əcnəbilərin imkanlarından asılı olmayaraq öz fədakarlıqları ilə əhəmiyyətli nüvə nailiyyətləri əldə ediblər.

İranın nüvə texnologiyasından “dinc məqsədlə istifadəsinə” toxunan İslami bildirib ki, hökumət nüvə elektrik enerjisi və radiofarmasevtika istehsalını artırmağı hədəfləyir.

O, qeyd edib ki, İran radiofarmasevtik istehsalını ən azı altı dəfə artırmağı planlaşdırır.

Şənbə günü Tehranda fəaliyyət göstərən Ettelaat qəzetində dərc olunan müsahibəsində İslami həmçinin bildirib ki, İranın uranı yüksək saflıq səviyyəsinə qədər zənginləşdirməsi sanksiyaları aradan qaldırmaq məqsədi daşıyır.

Busaat.az