Tehranda İnqilab Keşikçiləri Korpusunun komandiri öldürülüb

İranın paytaxtı Tehranda İnqilab Keşikçiləri Ordusunun komandirinin evinin qarşısında silahlı hücum nəticəsində həyatını itirdiyi bildirilib.

Busaat.az xəbər verir ki, İranın yarı rəsmi Fars Xəbər Agentliyinin məlumatına görə, İnqilab Keşikçiləri Ordusunun Tehrandakı Məhəmməd Rəsulullah Korpusunda xidmət edən Qasım Fətullahi adlı zabit odlu silahla hücuma məruz qalıb.

Paytaxtın cənubunda evinin qarşısında həyata keçirilən hücumda 4 güllə ilə vurulan Fətullahi həyatını itirib.

Hadisəni “terror hücumu” olaraq xarakterizə edən xəbərdə Fətullahinin həm də İnqilab Keşikçiləri Ordusuna bağlı Bəsiç milis birliyinin komandirlərindən biri olduğu bildirilib.

Digər tərəfdən, Tehran Polis İnformasiya Mərkəzinin rəisi, polkovnik Əli Səbahi hücumla bağlı araşdırmanın davam etdiyini və ətraflı məlumatın daha sonra veriləcəyini açıqlayıb.

Busaat.az