"Tələblərimiz yerinə yetirilməyənə qədər "hə" deyə bilmərik" - Mövlud Çavuşoğlu

Türkiyə Ankaranın tələblərini yerinə yetirməyənə qədər İsveç və Finlandiyanı NATO-ya qəbul etməyə razı olmayacaq.

Busaat.az xəbər verir ki, bu fikirləri Türkiyənin xarici işlər naziri Mövlud Çavuşoğlu bildirib.

“Tələblərimiz yerinə yetirilməyənə qədər onların NATO-ya üzvlüyünə “hə” deyə bilmərik. Hazırkı şəraitdə parlament bu protokolu ratifikasiya etməyəcək”.

Bundan əvvəl Stokholmdakı Türkiyə səfirliyi yaxınlığında Quranın yandırılması ilə bağlı Türkiyə və İsveç arasında böyük qalmaqal yaşanıb. Yanvarın 21-də sağçı ekstremist Hard Line partiyasının lideri Rasmus Paludan Türkiyə səfirliyinin qarşısında Quranın nüsxəsini açıq şəkildə yandırıb. O, çıxışında Türkiyə prezidenti Tayyib Ərdoğanı tənqid edib və Məhəmməd peyğəmbərin karikaturasını nümayiş etdirib.

Qeyd edək ki, hadisədən sonra İsveçin NATO-ya üzvlüklə bağlı müraciətinə baxılması prosesi dayandırılıb. İki ölkənin NATO-ya qəbulu üçün Türkiyə parlamentinin təsdiqi lazımdır.

Busaat.az