Terror təhlükəsi olmadığı təqdirdə Hindistan Pakistanla danışıqlara hazırdır - Hindistan XİN

Hindistan terror təhlükəsi və düşmənçiliyin olmadığı bir şəraitdə Pakistanla münasibətlərin normallaşdırılmasına dair danışıqlara hazırdır.

Busaat.az xəbər verir ki, bunu Hindistan Xarici İşlər Nazirliyinin rəsmi nümayəndəsi Arindam Bağçi bildirib.

“Hindistanın bu məsələdə mövqeyi hərkəsə bəllidir. Biz bütün qonşularımızla, o cümlədən Pakistanla normal mehriban qonşuluq münasibətləri arzulayırıq. Bunun üçün terror və düşmənçilikdən azad bir mühit lazımdır”, – Bağçi deyib.

Rəsmi Dehlinin bu bəyanatı Pakistanın baş naziri Şahbaz Şərifin Hindistanla ikitərəfli münasibətlərin normallaşdırılması ilə bağlı danışıqlara başlamaq istəyinə cavabdır.

Şahbaz Şərif daha əvvəl qeyd etmişdi ki, Pakistan və Hindistan arasındakı ciddi məsələlər sülh danışıqları yolu ilə həll edilmədikcə, normal qonşuluqdan danışmaq olmaz.

Nazir bildirib ki, müharibə ölkələr arasında mübahisəli məsələlərin həlli vasitəsi deyil və İslamabad danışıqlar masasında Yeni Dehli ilə problemləri ciddi şəkildə müzakirə etməyə hazırdır.

Busaat.az