"TikTok Shop" ABŞ-da kadr ixtisarlarına başladı

“TikTok Shop” ABŞ-də bir sıra təşkilati və kadr dəyişiklikləri çərçivəsində işçilərini ixtisar etməyə başlayıb. İxtisarlar əsas brendlərlə qarşılıqlı əlaqədə olan, qlobal müştərilərlə işləyən şöbə və bölmələrdə işləyən işçilərə təsir edəcək.

Busaat.az xəbər verir ki, bu barədə şirkətin daxili poçt siyahısına və anonim işçilərin sözlərinə istinadən “Business Insider” nəşri məlumat verib.

Elektron ticarət şöbəsinin rəhbəri Mu Tsin tərəfindən göndərilən sənəddə bildirilir ki, şirkət komandanın uzunmüddətli inkişafı üçün daha səmərəli əməliyyat modelləri yaratmağın yollarını diqqətlə nəzərdən keçirdikdən sonra bu dəyişikliklərə qərar verib.

Qeyd olunur ki, bəzi işçilərə ikiaylıq inzibati məzuniyyət və şirkətdə iş stajına görə əlavə kompensasiya daxil olmaqla, işdən çıxma paketi təklif olunub. İxtisara məruz qalan işçilərin dəqiq sayı açıqlanmır.

Xatırladaq ki, kadr dəyişiklikləri “TikTok”un ABŞ-dəkı elektron ticarət biznesi üçün çətin bir dövrə təsadüf edir. Tramp administrasiyasının tətbiq etdiyi yeni tariflərdən qaynaqlanan iqtisadi qeyri-müəyyənlik səbəbindən bu il bazarın satışları yavaşlayıb.