Türk polisindən uğurlu əməliyyat: Suriyada İŞİD və PKK-dan 18 terrorçu yaxalandı

Türkiyə Daxili İşlər Nazirliyi Suriyanın Cerablus və Bab bölgələrində keçirilən əməliyyatlar zamanı İŞİD terror təşkilatının maliyyə işlərindən məsul şəxsi də aralarında olmaqla 18 terrorçunun ələ keçirildiyini bildirib.

Busaat.az xəbər verir ki, bu barədə məlumatı nazirlik özü yayıb.

Dekabrın 3-də Cerablus və Bab bölgəsində həyata keçirilən əməliyyatlarda, baza genişləndirmə, təbliğat, kadr toplama və kəşfiyyat toplama kimi fəaliyyətlər həyata keçirən 13 İŞİD terrorçusu, o cümlədən təşkilatın maliyyə işlərindən məsul şəxsi yaxalanıb.

Həmin gün təxribat məqsədilə Cerablus bölgəsinə göndəriləcəyi müəyyən edilən 5 PKK/KCK/PYD/YPG terror təşkilatı üzvü də saxlanılıb.

Şübhəlilərin evlərində aparılan axtarışlar zamanı partlamağa hazır 10 kiloqram əl istehsalı bomba komplekti, 4 bomba elektron lövhəsi, Kalaşnikov piyada tüfəngi, tapança və 253 patron ələ keçirilib.

Busaat.az