Ankara Şimali Atlantika Alyansından (NATO) çıxmaq imkanını nəzərdən keçirmir.
Busaat.az xəbər verir ki, bu sözləri Ədalət və İnkişaf Partiyasının (AKP) sözçüsü Ömər Çelik bildirib.
“Hər seçkidə belə şeylərlə qarşılaşırıq. Bunlar bizim narahat olacağımız şeylər deyil. Türkiyənin NATO üzvlüyünə son qoymağa çağıranlar məntiqli danışmırlar. Bundan söhbət gedə bilməz. Biz NATO-nun qurucu ölkələrindən biriyik. Onların dedikləri NATO üçün lüks olardı”, – o, CNN Türk telekanalına müsahibəsində deyib.
Bundan əvvəl Türkiyənin Ana Vətən Partiyasının sədr müavini Ethem Sancak bəyan etmişdi ki, Ankaraya qarşı təxribat xarakterli hərəkətlərə görə Türkiyə 5-6 ay ərzində NATO-dan çıxa bilər. Onun sözlərinə görə, son sorğular Türkiyə əhalisinin ən azı 80%-nin “ABŞ-ın Türkiyəyə qarşı düşmən və dağıdıcı siyasət yürüdən ölkə olduğuna” əmin olduğunu göstərib.
Ana Vətən Partiyası yanvarın 19-da hökumətə təzyiq etmək üçün “NATO-dan çıxaq” kampaniyasına başladığını elan edib. Siyasi hərəkat, həmçinin kampaniya çərçivəsində bir sıra şəhərlərdə meydanlarda imza toplamaq üçün masalar qurmağı planlaşdırdığını bildirib. Bundan başqa NATO-nun Türkiyədəki bazalarına qarşı mitinqlər və etiraz aksiyaları keçiriləcək.
Qeyd edək ki, Ana Vətən Partiyasının lideri Doğu Perinçek “güclü NATO Türkiyə üçün güclü təhdid deməkdir” deyib.
Busaat.az
