Türkiyənin müdafiə naziri Hulusi Akar NATO-nu Afinanın Ankaraya qarşı təxribat xarakterli hərəkətlərini dayandırmağa çağırıb.
Busaat.az xəbər verir ki, Türkiyə Müdafiə Nazirliyi bir müddət əvvəl NATO missiyası çərçivəsində uçan türk döyüş təyyarələrinə Yunanıstan tərəfinin müdaxilə etməyə cəhd etdiyini bildirib.
“Afina qanunsuzluq edir. NATO nəhayət, bu cür hərəkətlərə dayan deməlidir. Türkiyə Ege və Aralıq dənizlərinin dostluq zonasına çevrilməsinin tərəfdarıdır. Yunanıstan barışmaz mövqeyindən əl çəkməli və tarixdən dərs almalıdır” – deyə, Akar qeyd edib.
Nazir əlavə edib ki, Türkiyənin də daxil olduğu NATO bloku həmişə güclü struktur olacaq.
Qeyd edək ki, Türkiyə Ege dənizinin şərqindəki Yunan adalarının hərbiləşdirilməsinə son qoyulmasını tələb edir. Türkiyənin xarici işlər naziri Mövlud Çavuşoğlu deyib ki, adaların hərbiləşdirilməsi uzun müddətdir mövcud olan beynəlxalq müqavilələri pozur və adaların suverenliyini şübhə altına alır. Onun sözlərinə görə, Yunanıstan qanun pozuntularını dayandırmasa, Türkiyə adaların suverenliyini müzakirə etmək və etiraz etməkdə qərarlıdır.
Busaat.az
