Türkiyə parlamenti Finlandiyanın NATO-ya daxil olması ilə bağlı protokolun ratifikasiyası haqqında qanun layihəsini təsdiqləyib.
Busaat.az xəbər verir ki, parlamentdə iştirak edən 276 deputatın hamısı qərarın lehinə səs verib.
Bundan başqa deputatlar Finlandiya ilə birgə NATO-ya üzvlük iddiası ilə çıxış edən İsveçin Türkiyə ilə memorandumun müddəasını hələlik yerinə yetirmədiyini və bu səbəbdən alyansa qoşulmağa hazır olmadığını bildiriblər.
Qeyd edək ki, 2022-ci ilin may ayında Finlandiya və İsveç NATO-ya üzv olmaq üçün müraciət etmişdilər, lakin onların üzvlük təklifi Ankara tərəfindən dərhal etirazla qarşılanmışdı. Türkiyə Skandinaviya ölkələrindən terror təşkilatlarını “terrorçu” elan etməyi, terror fəaliyyətində və ya 2016-cı ildə dövlət çevrilişi cəhdinə kömək və dəstək göstərməkdə ittiham olunan şəxslərin Türkiyəyə təhvil verilməsini tələb edib.
Ankara daha sonra Helsinkiyə münasibətini yenidən nəzərdən keçirərək, ümumilikdə sazişin şərtlərinə əməl etdiyini qeyd edib.
Busaat.az
