Türkiyə və Rusiya prezidentləri arasında telefon danışığı olub

Rusiya prezidenti Vladimir Putinlə Türkiyə lideri Rəcəb Tayyib Ərdoğan arasında telefon danışığı olub.

Busaat.az xəbər verir ki, telefon danışığı  zamanı Rusiya-Türkiyə çoxşaxəli əməkdaşlığının müxtəlif istiqamətləri üzrə dialoq davam etdirilib.

Putin Qara dəniz limanlarından Ukrayna taxılının ixracına dair “paket” sazişlərinin fəaliyyətinin dayandırılması, Rusiya ərzaq və gübrələrinin tədarükünün qarşısının alınması ilə bağlı Rusiyanın prinsipial mövqeyini təqdim edib.

Bildirilib ki, “taxıl sazişi”nin Rusiya hissəsinin həyata keçirilməsində tam tərəqqi olmadığı üçün onun uzadılması mənasızdır.

Kremlin mətbuat xidmətindən verilən məlumata görə, Qərb Rusiya qarşısında bütün öhdəliklərini praktiki olaraq yerinə yetirən kimi İstanbul razılaşmalarına qayıtmaq mümkündür.

Qeyd edilib ki, ərzağa daha çox ehtiyacı olan ölkələrin tələbləri nəzərə alınmaqla, Rusiyadan buğda tədarükü üçün etibarlı variantlar hazırlanır.

Bundan başqa, prezidentlər  ticarət-iqtisadi əlaqələrin daha da inkişaf etdirilməsi, enerji sektorunda birgə strateji layihələrin həyata keçirilməsi, eləcə də turizm sektorunda əməkdaşlığın inkişaf etdirilməsi məsələlərini diqqət mərkəzində saxlayıblar.

Ərdoğan öz növbəsində Türkiyədə  meşə yanğınlarının söndürülməsinə verdiyi dəstəyə görə Putinə və Rusiya xalqına minnətdarlığını bildirib.

Sonda prezidentlər mümkün görüşə hazırlıq kontekstində təmasların davam etdirilməsi barədə razılıa gəliblər.

Busaat.az