Türkiyədən gətirilən 6 ailə tibb müəssisəsinə yerləşdirildi
Prezident İlham Əliyevin tapşırıq və göstərişlərinə uyğun olaraq, Türkiyədə güclü zəlzələ nəticəsində həmin bölgələrdə zərərçəkmiş Azərbaycan vətəndaşlarının və onların digər ölkə vətəndaşları olan yaxın ailə üzvlərinin ölkəmizə təxliyəsi istiqamətində işlər davam etdirilir.
Səhiyyə Nazirliyindən Busaat.az-a verilən məlumata görə, 10 fevral tarixində ölkəyə gətirilən vətəndaşlarımız arasında 10 uşaq və 12 böyük, ümumilikdə 6 ailə Səhiyyə Nazirliyinin K. Fərəcova adına Elmi-Tədqiqat Pediatriya İnstitutuna gətirilib.
Nazirliyin Səhiyyənin təşkili şöbəsinin Qadın, ana, uşaq və yeniyetmələrin sağlamlığının qorunması sektorunun müdiri Aynurə Zeynalova qeyd edib ki, gələn 10 uşaqdan 6-sı oğlan, dörd nəfəri isə qızdır.
O qeyd edib ki, Bakı və digər şəhərlərdə, eləcə də Naxçıvan MR-də yerləşən tibb müəssisələrinin zəlzələdə zərərçəkmiş şəxslərin müalicəsi üçün hazır vəziyyətə gətirilib. Bu məqsədlə ümumilikdə tibb müəssisələrində 2000 çarpayı ayrılıb.
