Ukrayna limanları taxıl müqaviləsi çərçivəsində 11 milyon ton ərzaq ixrac edib – Zelenski

Ukrayna limanları taxıl müqaviləsi çərçivəsində ixrac olunan ərzaq məhsullarının ümumi həcmi 11 milyon ton təşkil edib.

Busaat.az xəbər verir ki, bunu Ukrayna prezidenti Volodimir Zelenski deyib.

“Avqustun 1-dən etibarən 450-dən çox gəmi Odessa, Çernomorsk və Yujnı  limanlarından yola düşüb. İxrac olunan ərzaq məhsullarının ümumi həcmi 11 milyon tontəşkil edib. Coğrafiya genişdir: Mərakeş, Əlcəzair, Liviya,  Tunis, Misir, Sudan, Efiopiya, Somali, Keniya, Yəmən, Livan, Banqladeş, Çin, Hindistan, İndoneziya, Türkiyə, eləcə də Aİ ölkələrinə ərzaq məhsullarımız ixrac olunur” -deyə, Zelenski Telegram kanalında yayımladığı videomüraciətdə bildirib.

Qeyd edək ki, Türkiyə prezidenti Rəcəb Tayyib Ərdoğan iyulda İstanbulda imzalanan taxıl müqaviləsinin 120 gün müddətinə uzadıldığını bildirib.  Rusiya Xarici İşlər Nazirliyi sövdələşmə tərəflərinin (Rusiya, Ukrayna, Türkiyə və BMT) etirazı olmadığı üçün vaxtın avtomatik olaraq uzadıldığını qeyd edib.

İyulun 22-də İstanbulda 120 gün müddətinə Ukraynadan ərzaq ixracına dair razılaşmalar əldə olunub.