“Rusiyanın Moldova Respublikasındakı vəziyyəti pozmağa çalışdığına dair iddiaları qəti şəkildə rədd edirik”.
Busaat.az xəbər verir ki, bunu Rusiya Xarici İşlər Nazirliyinin sözçüsü Mariya Zaxarova mediaya açıqlamasında deyib.
Zaxarova Moldova prezidenti Maya Sandunun, “Rusiya ölkədəki sabitliyi pozmağı planlaşdırır”, – sözləri ilə bağlı yazılı açıqlama verib.
Sandu sözügedən planların onlara Ukraynanın çatdırdığını qeyd edib.
Rusiya Xarici İşlər Nazirliyinin sözçüsü Zaxarova bildirib ki, belə iddialar Ukraynanın, ABŞ və digər Qərb ölkələrinin tez-tez istifadə etdiyi klassik üsullardır:
“Yoxlanılması mümkün olmayan gizli kəşfiyyat məlumatlarına istinad edərək ittihamlar irəli sürürlər. Yalan məlumatlar yayan Kiyevin əsas məqsədi Moldovanı Rusiya ilə sərt qarşıdurmaya salmaqdır.
Rusiya Moldova Respublikasının təhlükəsizliyinə təhdid yaratmır. Rusiyanın Moldova Respublikasındakı vəziyyəti pozmağa çalışması ilə bağlı iddiaları qəti şəkildə rədd edirik. Qərb dövlətləri və Ukraynadan fərqli olaraq biz Moldovanın və dünyanın digər ölkələrinin daxili işlərinə qarışmırıq. Biz Moldova hökumətini müdriklik nümayiş etdirməyə, xarici təxribatlara boyun əyməməyə və öz vətəndaşlarının maraqlarından çıxış etməyə çağırırıq”.
Busaat.az
