Rusiya ordusu gecə saatlarında Ukraynanın paytaxtı Kiyevə raket hücumu edib və 20 hədəfin hamısı havada məhv edilib.
Busaat.az xəbər verir ki, Kiyev Şəhər Hərbi İdarəsinin rəisi Sergey Popko sosial media hesabından verdiyi yazılı açıqlamada Rusiya ordusunun yenidən paytaxt Kiyevə raket hücumu təşkil etdiyini açıqlayıb.
Rusiya ordusunun dünən axşam saatlarında Kiyevə növbəti intensiv hava hücumu həyata keçirdiyinə dair açıqlamada X-101/555 tipli qanadlı raketlərin Xəzər dənizi bölgəsindən paytaxta doğru atıldığı qeyd edilib.
Popko açıqlamasında bildirib ki, mövcud məlumata görə, Ukrayna hava hücumundan müdafiə qüvvələri tərəfindən bütün hədəflər məhv edilib: “İlkin məlumatlara görə, ətraf hava məkanında hava hücumundan müdafiə qüvvələri tərəfindən düşmənin 20-dən çox hava hədəfi aşkar edilərək məhv edilib”.
Məhv edilmiş raket hissələrinin şəhərin Desnyan rayonundakı bazarın elektrik xətlərinə və şüşələrinə zərər verdiyini qeyd edən Popko, ölən və yaralananlar barədə hələlik məlumat daxil olmadığını bildirib.
Busaat.az
