Ukrayna üzrə tribunal Riqada yerləşdirilsin - Latviya prezidenti

Ukrayna üzrə beynəlxalq tribunal Riqada keçirilə bilər, ancaq bu ideya Avropa İttifaqında hamı tərəfindən bəyənilməyib.

Busaat.az xəbər verir ki, bu barədə məlumatı Latviya prezidenti Egils Levits yayıb.

Avropa İttifaqının (Aİ) xarici işlər və təhlükəsizlik siyasəti üzrə ali nümayəndəsi Josep Borrel çərşənbə günü bildirib ki, Avropa Komissiyasının Ukrayna üzrə ixtisaslaşmış beynəlxalq tribunal təklifi Brüsseldə keçirilən son iclasda Avropa İttifaqının xarici işlər nazirləri arasında yekdil dəstək tapmayıb.

Latviya prezidenti iddia edir ki, belə bir tribunal üçün Rusiyanın veto hüququna malik olduğu BMT Təhlükəsizlik Şurasının qərarı lazım deyil: “Bunu digər təşkilatlar da edə bilər, məsələn, Avropa Şurası və ya sadəcə olaraq ölkələr arasında müqavilə əsasında, eyni fikirdə olan ölkələr belə bir tribunal yarada bilərlər”.

Qeyd edək ki, Avropa Komissiyası noyabrın sonunda BMT-nin himayəsi altında Ukrayna üzrə xüsusi beynəlxalq tribunalın yaradılması təşəbbüsü ilə çıxış edib.

Busaat.az