Ukrayna Kaxovka bəndinin vurulmasından sonra Xersonda suyun səviyyəsinin azalmağa başladığını açıqlayıb.
Busaat.az-ın məlumatına görə, Xerson vilayətinin Hərbi Administrasiyasının rəhbəri Aleksandr Prokudin bildirib ki, Kaxovka bəndinin vurulmasından sonra artan suyun həcmi Xerson vilayətində 20 santimetr azalıb.
Prokudin sosial media hesabından verdiyi video açıqlamada seldən zərər çəkmiş Xerson bölgəsindəki son vəziyyəti dəyərləndirib. Suyun səviyyəsində azalma tendensiyası olduğunu ifadə edən Prokudin qeyd edib: “Gecə saatlarında suyun 20 santimetr aşağı düşdüyünü gördük. Səhər saatlarına olan məlumata görə, rayonda suyun səviyyəsi 5,38 metr təşkil edir. Xerson şəhərində 5,35 metr yüksəklikdədir”.
Prokudin bildirib ki, bölgənin 32 yaşayış məntəqəsində 3624 ev su altında qalıb, 2352 nəfər və 550-yə yaxın heyvan təxliyə edilib.
Ukrayna Su Elektrik Stansiyaları Korporasiyasının (Ukrgidroenergo) sosial media hesabından edilən açıqlamada Kaxovka bəndində suyun səviyyəsinin azalmağa davam etdiyi bildirilib. Nikolpol şəhəri yaxınlığındakı bəndin suyunun səviyyəsi səhər saat 08:00-a olan məlumata görə 11,74 metr təşkil edib. İyunun 6-da səhər saatlarından su 4,7 metr azalıb.
Busaat.az
