“30 sentyabrda Kremldə yeni bölgələrin Rusiyaya birləşdirilməsi ilə bağlı imzalanma mərasimi olacaq. Rusiya prezidenti Vladimir Putin geniş çıxış edəcək”.
Busaat.az xəbər verir ki, bunu Kremlin sözçüsü Dmitri Peskov Ukraynada referendumun keçirildiyi bölgələrlə bağlı açıqlamasında qeyd edib.
Ukraynanın rusiyapərəst separatçıların nəzarətində olan qondarma Donetsk və Luqansk Xalq Respublikalarının, eləcə də Rusiya ordusunun ələ keçirdiyi Xerson və Zaporojya bögələrinin Rusiyaya birləşdirilməsi ilə bağlı sabah mərasim keçiriləcəyini bildirən Peskov qeyd edib: “Sentyabrın 30-da Kremldə yeni bölgələrin Rusiyaya birləşdirilməsi ilə bağlı imzalanma mərasimi olacaq. Mərasim saat 15:00-da keçiriləcək. Prezident Putin geniş çıxış edəcək”.
Peskov Putinlə Türkiyə prezidenti Rəcəb Tayyib Ərdoğan arasında telefon danışığı üçün hazırlıq görüldüyünü də bildirib.
Peskov həmçinin “Şimal axını 1” və “Şimal axını 2” təbii qaz kəmərlərində yaşanan sızmanın təxribat olduğu barədə yayılan məlumatları da qiymətləndirib: “Bu, təcili araşdırma tələb edən son dərəcə təhlükəli vəziyyətdir”.
Busaat.az
