Mütəxəssislər hesab edirlər ki, ürəyin sağlam qalması üçün müntəzəm fiziki aktivlik vacibdir. Mövcud məşq növləri arasında isə üzgüçülük ürək-damar sistemini gücləndirmək və qan dövranını yaxşılaşdırmaq baxımından ən faydalı məşqlərdən biri hesab olunur.
Busaat.az xəbər verir ki, bu barədə Onet Kobieta nəşri yazıb.
Mütəxəssislərin sözlərinə görə, üzgüçülük bütün bədəni işlədən aerob məşq növüdür. O, eyni zamanda ürəyin, ağciyərlərin və əzələlərin fəaliyyətini yaxşılaşdırır.
Üzgüçülüyün əsas üstünlüklərindən biri onun oynaqlara az yük verməsidir. Suyun qaldırıcı qüvvəsi və müqaviməti sayəsində zədə riski azalır, eyni zamanda ürək-damar sistemi effektiv şəkildə məşq olunur.
Həkimlər bildirirlər ki, müntəzəm üzgüçülük ürəyi gücləndirir, onun fəaliyyətini yaxşılaşdırır, xolesterinin səviyyəsini normallaşdırmağa, arterial təzyiqi azaltmağa və ürək-damar xəstəlikləri riskini aşağı salmağa kömək edir.
Araşdırmalar göstərib ki, müntəzəm üzən insanlarda ürək xəstəlikləri və ya insultdan ölüm riski üzməyənlərlə müqayisədə 41 faiz daha aşağıdır. Bundan əlavə, həkim nəzarəti altında üzgüçülük ürək-damar xəstəliklərindən sonra reabilitasiya keçən insanlar üçün də təhlükəsiz və faydalı məşq hesab olunur.
Üzgüçülük qan dövranına necə təsir edir?
Mütəxəssislər qeyd edirlər ki, suda hərəkət zamanı demək olar ki, bütün əzələlər işlədiyindən ürək qanı daha səmərəli şəkildə dövr etdirməyə məcbur olur. Bu isə qan dövranını yaxşılaşdırır, ürək-damar sistemini möhkəmləndirir və ağciyərlərin həcmini artırır.
Bundan başqa, su oynaqlara düşən yükü azaltdığı üçün üzgüçülük oynaq ağrıları, artıq çəki və ya hərəkət məhdudiyyəti olan insanlar üçün də uyğun fiziki aktivlik sayılır.
