Yanvar ayı üçün ABŞ-da inflyasiya gözləntiləri üstələdi

ABŞ-da İstehlak Qiymətləri İndeksi (CPI) yanvar ayında aylıq 0,5 faiz, illik bazda isə 6,4 faiz artıb.

Busaat.az xəbər verir ki, ABŞ Əmək Nazirliyi yanvar ayı üçün inflyasiya məlumatlarını açıqlayıb.

Açıqlamaya görə, ABŞ-li istehlakçıların yaşayış dəyəri yanvar ayında  yüzdə 0,5 artıb.

Yanvarda ölkədə istehlak qiyməti indeksi illik bazda yüzdə 6,4 artıb.

Sözügedən dövrdə inflyasiyanın aylıq artımına ən çox təsir edən mənzil qiymətləri olub. Mənzil indeksi yanvar ayında aylıq 0,7 faiz, illik bazda isə 7,9 faiz artıb.

Bununla yanaşı ərzaq, benzin və təbii qazın da qiymətlərində də artım müşahidə olunub. Yanvarda ərzaq indeksi aylıq 0,5 faiz, illik 10,1 faiz artıb. Yanvarda enerji indeksi də aylıq 2 faiz, illik isə 8,7 faiz artıb. Enerji maddəsi üzrə benzinin qiymətləri aylıq 2,4 faiz, illik 1,5 faiz, təbii qazın qiymətləri isə aylıq 6,7 faiz, illik 26,7 faiz artıb.

Qeyd edək ki, ABŞ-də inflyasiya 2022-ci ilin iyununda 9,1 faizə çatıb ki, bu da 1981-ci ilin noyabrından bəri ən yüksək səviyyədir.

Busaat.az