Yaponiyanda "Lan" qasırğası nəticəsində 20 nəfər xəsarət alıb

Yaponiyanın mərkəzi və qərbində şiddətli yağışlarla yanaşı, “Lan” qasırğası da ölkədə həyatı iflic edib.

Busaat.az xəbər verir ki, bu barədə Yaponiya İctimai Televiziyası məlumat yayıb.

Bildirilib ki, nəticədə Hyoqo Osaka, Kyoto, Şiqa və Vakayama prefekturalarında 20 nəfər xəsarət alıb. Ölkədə daşqınlar, elektrik enerjisinin kəsilməsi və nəqliyyatda fasilələr yaşanır.

Yaponiya Meteorologiya Agentliyi Honsyu bölgəsindəki Kii yarımadasına çatan qasırğanın ölkənin şərq və şimalında Hokkaydoya doğru istiqamətlənəcəyini bildirib.

Qasırğanın vurduğu ərazilərdə yerli bələdiyyələr 230 mindən çox sakinə daha təhlükəsiz binalarda sığınacaq axtarmaları barədə xəbərdarlıq edib.

Kyodo News xəbər verir ki, qasırğa səbəbindən 650-yə yaxın insan Osaka əyalətindəki Kansai Beynəlxalq Hava Limanında qapalı qalıb, uçuşlar təxirə salınıb.

“Central Japan Railway Co. ” və “West Japan Railways ” Osaka prefekturasında yüksək sürətli qatar xidmətlərini ləğv edib.

Yaponiyanın iki ən böyük aviaşirkəti – “Japan Airlines” (JAL) və “All Nippon Airways” (ANA) ölkənin qərbindən və ya qərbinə 560-dan çox reysitəxirə salıb.