Yaponiyanın keçmiş baş naziri Abenin qatili psixiatriya mərkəzindən həbsxanaya köçürülüb

Keçən ilin yayında Yaponiyanın keçmiş baş naziri Şinzo Abeni güllələyərək öldürən işsiz yapon Tetsuya Yamaqaminin ötən iyul ayından aparılan icbari psixiatriya müayinəsi nəticəsində ağlı başında olduğu məlum olub.

Busaat.az TBS televiziyasının məlumatına istinadən xəbər verir ki, o, qapalı tibb müəssisəsindən Nara polis həbsxanasına köçürülüb.

Yamaqaminin yanvarın 13-dək qətl və qanunsuz silah saxlama ittihamları ilə üzləşəcəyi gözlənilir.

Qeyd edək ki, keçmiş dənizçi iyulun 8-də Yaponiyanın əsas adasının cənub-qərbində yerləşən Nara şəhərindəki küçədə seçki mitinqində çıxış edən keçmiş baş nazir Abeni kürəyindən atəş açaraq öldürmüşdü. Yamaqami özünün hazırladığı və hərtərəfli sınaqdan keçirdiyi çoxlüləli odlu silahdan istifadə edib. Atəş açan şəxs qətlə yetirilən siyasətçinin mühafizəçiləri tərəfindən hadisə yerində tutularaq həbs edilib.

Dindirilmə zamanı o, keçmiş baş naziri “Birləşmə kilsəsi” dini təşkilatı ilə əlaqəsi olduğuna əmin olduğu üçün öldürdüyünü bildirib. Anası bu təşkilatın fanatik tərəfdarı olmuş, demək olar ki, bütün var-dövlətini bu təşkilata bağışlamış və ailəni iflasa aparmışdı. Sonrakı araşdırmalar nəticəsində məlum olub ki, ardıcıllarından külli miqdarda pul qoparmaqda ittiham olunan “Birləşmə kilsəsi” Yaponiyada hakim Liberal Demokrat Partiyasının bir çox yüksək vəzifəli üzvləri ilə əlaqə saxlayır. Hazırda “Birləşmə Kilsəsi” araşdırılır.

Busaat.az