Ukraynanın paytaxtı Kiyevə səfəri ilə bağlı Kathimerini qəzetinə məqalə yazan Yunanıstanın xarici işlər naziri Nikos Dendias Yunanıstanı Ukraynaya, Türkiyəni isə Rusiyaya bənzədib.
Busaat.az xəbər verir ki, ötən həftə Ukraynanın paytaxtı Kiyevə səfər edən Yunanıstanın xarici işlər naziri Nikos Dendias bu səfərlə bağlı yazdığı məqalədə Türkiyəni hədəfə alıb.
Ukraynalı həmkarı Dimitri Kuleba ilə Kiyevdə mətbuat konfransı keçirən Dendias, Ankara-Afina xəttində son vaxtlar artan gərginliyə toxunaraq, Türkiyənin Yunanıstanı müharibə ilə hədələdiyini iddia edib.
Nikos Dendias səfərlə bağlı Kathimerini qəzetinə məqalə yazıb. Kiyevdə həyacan siqnalı səsləndikdən sonra sığınacağa enmək məcburiyyətində qaldıqlarını qeyd edən Dendias, səfərinin Türkiyəyə bir mesaj olduğunu eyham edərək, “Kiyev Yunanıstanın üzləşdiyi təhlükəni beynəlxalq ictimaiyyətə izah etmək üçün çox uyğun bir yer idi” – deyə, qeyd edib.
“TÜRKİYƏ RUS TAKTİKASINI MƏNİMSƏYİR”
Yunanıstanın da Ukrayna kimi şərqdəki qonşusunun təcavüzü ilə üzləşdiyini iddia edən Dendias, “Hər iki qonşu torpaqlarımızda haqq iddia edir” deyərək, Yunanıstanı Ukrayna, Türkiyəni Rusiya ilə müqayisə edib.
Türkiyə və Rusiyanın sərhədlərə hörmət etmədiyini yazan yunan nazir Türkiyənin Rusiyanı təqlid etdiyini və Rusiya taktikasını mənimsəyərək Yunanıstana “Yeni Ukrayna olmaq istəmirsinizsə, diqqətli olun” mesajını verdiyini iddia edib. ABŞ, Avropa İttifaqı və digər tərəfdaşlarla müttəfiqliklərini genişləndirdiklərini qeyd edən Dendias, bir çox ölkələrin də onları dəstəklədiyini əlavə edib.
