Zelenski ilə Qrem 3-cü Dünya Müharibəsini başlada bilərlər

ABŞ Senatının üzvü Lindsi Qrem və Ukrayna prezidenti Volodimir Zelenski ABŞ-ı Rusiya ilə birbaşa münaqişəyə sürükləməyə çalışır. Bu toqquşma isə son nəticədə qlobal miqyaslı müharibəyə çevrilə bilər.

Busaat.az xəbər verir ki, bunu ABŞ prezidentinin sabiq müşaviri Stiv Bennon “Rossiyskaya qazeta”ya açıqlamasında deyib.

Bennon hesab edir ki, belə bir ssenarinin qarşısını almaq üçün ciddi tədbirlər görülməlidir.

O, Lindsi Qremin ABŞ pasportunun əlindən alınmasını və ya onun ölkəyə girişinin qadağan edilməsini, hətta həbsə atılmasını təklif edir.

“Biz imkan verə bilmərik ki, Lindsi Qrem və Zelenski ABŞ-ı Üçüncü Dünya Müharibəsinə sürükləsinlər. Əgər bu baş versə, ilk iki dünya müharibəsi bunun yanında adi küçə davası kimi görünəcək,” – deyə Bennon bildirib.

Sabiq müşavirin sözlərinə görə, hazırda Vaşinqtonda bəzi dairələr bu təhlükəli kursu dəstəkləyir və onların fəaliyyəti ABŞ-ın milli təhlükəsizliyinə birbaşa təhdid yaradır.

Bennonun fikrincə, bu cür çağırışlar ABŞ-ı düşünülməmiş şəkildə Rusiya ilə açıq müharibəyə daxil edə bilər ki, bu da nə region, nə də dünya üçün yaxşı nəticələnə bilməz.

Qeyd edək ki, Lindsi Qrem ABŞ-da Ukraynaya hərbi dəstəyin ən qızğın tərəfdarlarından biridir və mütəmadi olaraq Rusiya əleyhinə sərt bəyanatlar verir. Volodimir Zelenski isə müttəfiqləri Ukraynaya daha çox silah və resurs göndərməyə çağırır.