Zelenski Ukraynanın NATO-ya üzvlük istəyini bir daha təsdiqlədi

Ukrayna prezidenti Volodimir Zelenski Ukraynanın NATO-ya üzv olmaq arzusunu təkrarlayıb.

Busaat.az xəbər verir ki, bu barədə CNN məlumat yayıb.

Məlumata görə, Zelenski Dünya İqtisadi Forumunda çıxışı zamanı alyansın Ukrayna üçün ən yaxşı təhlükəsizlik təminatı olduğunu bildirib:

“Təhlükəsizlik zəmanətləri bizim üçün əsas prioritetdir. Biz başa düşürük ki, hazırda biz hələ alyansın üzvü deyilik, təəssüf ki, Rusiya bunu yaxşı bilir və onlar bizim üzv olmağımızı çətinləşdirmək üçün əllərindən gələni edirlər. Amma biz NATO-ya doğru gedirik, çünki NATO bizim üçün, ölkəmiz, uşaqlarımız üçün ən yaxşı təhlükəsizlik zəmanətidir”.

Onun sözlərinə görə, Rusiya 2014-cü ildə Krımı ələ keçirəndə və sonra 2022-ci ilin fevralında bütün ölkəni işğal etməyə cəhd edəndə dünya tərəddüd edib: “Dünya bu gün və heç vaxt tərəddüd etməməlidir. Dünya Rusiyanın yeni addımlar atmasından daha sürətli hərəkət etməlidir. Ukraynanın hava hücumundan müdafiə sistemləri Rusiyanın növbəti raket hücumlarını dəf edəcək qədər güclü olmalıdır. Ukraynada təhlükəsizlik və sülhün bərpası Rusiyanın digər ölkələrdə təhlükəsizlik və sülhə qarşı hücumlarını geridə qoymalıdır”.