İNGİLTƏRƏ FƏLƏSTİN DÖVLƏTİNİ TANIMAQDAN İMTİNA EDİR

İngiltərənin Yaxın Şərqdən məsul Dövlət Naziri Hamish Falconer, hökumətinin mövqeyinin dəyişmədiyini bildirərək, ölkəsinin Fələstin dövlətini yaxın zamanda tanıması ilə bağlı çağrılarını rədd edib.

“Busaat.az” xəbər verir ki, Falconer, parlamentdə keçirilən iclasda Fələstinin Baş naziri Məhəmməd Mustafanın Londona etdiyi rəsmi səfəri dəyərləndirib və millət vəkillərinin suallarını cavablandırıb.

İclasda çıxış edən İngiltərə Parlamentinin Xarici Əlaqələr Komitəsinin sədri Emily Thornberry, İngiltərə hökumətini iyun ayında Fələstin dövlətini tanıyacaq olan Fransa ilə birləşməyə çağırıb. Thornberry, bunun İngiltərənin bölgədə iki dövlətli həllə nail olmaq cəhdlərində növbəti ciddi addım olacağı qənaətində olduğunu bildirib.

Falconer, Fələstin dövlətini tanımaq qərarı verən və İngiltərə hökumətindən fərqli mövqe tutan başqa ölkələrin olduğunu vurğulayıb. O, “Lakin bu, Fələstin dövlətinin mövcudluğunu yaratmayıb. İngiltərə hökuməti olaraq biz iki dövlətli həllə praktik töhfə verməyə çalışırıq və bu məsələyə də bu cür yanaşmağa niyyətliyik,” deyə bildirib.

Nərmin Səmidova

Busaat.az