ABŞ prezidenti Donald Tramp hökumət xərclərini azaltmaq üçün sərt addımlar atmaq niyyətindədir.
“Busaat.az” xəbər verir ki, Trampın 2026-cı il üçün təqdim etdiyi büdcə təklifində ətraf mühit, təhsil və xarici yardım sahələrində ümumilikdə 163 milyard dollarlıq kəsintilər nəzərdə tutulur.
Ən böyük zərbə Ətraf Mühitin Mühafizəsi Agentliyi (EPA), təmiz enerji layihələri, USAID agentliyi və təhsil qrantlarına dəyəcək. Xüsusilə yoxsul əhalini müdafiə edən “ekoloji ədalət” proqramları ciddi şəkildə ixtisar ediləcək.
Təklif, Tesla-nın baş direktoru İlon Maskın rəhbərlik etdiyi yeni Hökumət Səmərəliliyi Departamentinin təşəbbüsü ilə hazırlanıb. Məqsəd: uzunmüddətli dövrdə 1 trilyon dollarlıq qənaət.
Eyni zamanda sərhəd təhlükəsizliyi, hüquq-mühafizə və veteranlara dəstək kimi sahələrin maliyyəsi artırılacaq. Müdafiə büdcəsinə toxunulmayacaq.
Trampın bu planı hələlik hüquqi qüvvəyə malik deyil və Konqresdə ciddi müzakirələrə səbəb olacağı gözlənilir.
Nərmin Səmidova
Busaat.az
