Pentaqonun verdiyi açıqlamada, dünən yerli vaxtla saat 13:30 radələrində Suriyanın şimal-şərqində Haseke yaxınlığında anti-İŞİD koalisiyasına aid texniki xidmət obyektinin pilotsuz uçuş aparatı (PUA) ilə vurulduğu açıqlanıb.
Məlumata görə, hücumda ABŞ-nin 1 müqaviləli əməkdaşı ölüb, 5 ABŞ əsgərinin və daha 1 müqaviləlinin yaralandığı bildirilib.
Qeyd edilib ki, yaralanan əsgərlərdən 2-nə hadisə yerində tibbi yardım göstərilib, onlardan 3-ü və müqaviləli əsgər İraqdakı koalisiya qüvvələrinin tibb müəssisəsinə aparılıb. Kəşfiyyatın sözügedən pilotsuz uçuş aparatın İrana aid olduğunu qiymətləndirdiyi barədə məlumat paylaşılıb.
ABŞ-nin müdafiə naziri Lloyd Ostin İrana məxsus pilotsuz uçuş aparatı ilə edilən hücuma cavab olaraq İran İnqilab Keşikçiləri Ordusuna (SEPAH) bağlı qrupların istifadə etdiyi obyektlərə hava zərbələri endirildiyini açıqlayıb.
“Prezident Baydenin göstərişi ilə mən ABŞ Mərkəzi Komandanlıq qüvvələrinə bu gecə Suriyanın şərqində İran İnqilab Keşikçiləri Ordusuna bağlı qruplaşmaların istifadə etdiyi obyektlərə dəqiq hava zərbələri endirmək səlahiyyəti verdim”, – Ostin bildirib:
“Hava zərbələri bugünkü hücuma, eləcə də İnqilab Keşikçiləri Qvardiyasına bağlı qrupların Suriyadakı koalisiya qüvvələrinə qarşı son hücumlarına cavab olaraq həyata keçirilib”.
Busaat.az
