Avropa İttifaqı Rusiyaya qarşı yeni sanksiyaların tətbiqinə hazırlaşır

Avropa İttifaqı (Aİ) Rusiyaya qarşı yeni sanksiyaların hazırlanmasına başlayıb.

Busaat.az xəbər verir ki, bu barədə nüfuzlu Politico nəşri məlumat yayıb. Nəşrin məlumatına əsasən, hazırda Aİ Komissiyası Rusiyaya qarşı yeni sanksiyalar paketinin məzmunu üzərində işləyir. Komissiya bir neçə gün ərzində Aİ ölkələrinə yeni sanksiyalar paketi təklifini təqdim edəcək.

İttifaqa üzv dövlətlər Rusiya neftinə mümkün ən sərt qiymətlərin təyin edilməsi, sanksiyalar siyahısına daha çox rusiyalı məmurların daxil edilməsi, Rusiyadan almaz və digər dəyərli metalların alınmasının qadağan edilməsi kimi yeni məhdudlaşdırıcı tədbirləri müzakirə edəcəklər.

Aİ-nin iyul ayında təsdiqlədiyi 6-cı sanksiyalar paketinə əsasən, Rusiyadan dəniz yolu ilə Avropaya xam neft nəqlinin dekabrda başa çatması planlaşdırılır. Rusiya prezidenti Vladimir Putin isə neft və təbii qaz məhsullarının qiymətində ediləcək dəyişikliklərə reaksiya göstərərək, Rusiyanın ixracı dayandıracağını bildirib:

“Müqavilələrimizə zidd olarsa, neft, təbii qaz və ya kömür ixrac etməyəcəyik. Qərb öz şərtlərini bizə diktə etmək iqtidarında deyil. Bizim öz maraqlarımız var. Qoy məntiqli düşünsünlər”.

Busaat.az