Gürcüstanın Baş naziri İrakli Kobaxidze ölkənin hakim Gürcü Arzusu – Demokratik Gürcüstan Partiyasının yeni rəhbəri seçilib.
Bu barədə Busaat.az Gürcüstan KİV-ə istinadən xəbər verir.
Məlumata görə, siyasi birliyin qurultayında partiya üzvləri onun namizədinə səs veriblər.
“Qurultayın qərarı ilə İrakli Kobaxidze yekdilliklə “Gürcü Arzusu – Demokratik Gürcüstan” vətəndaşların siyasi birliyinin sədri seçilib”, – deyə partiyanın icraçı katibi Mamuka Mdinaradze səsvermədən sonra bildirib.
Qeyd edək ki, partiya sədri vəzifəsi 2024-cü ilin fevralından bu vəzifədə olan İrakli Qaribaşvilinin aprelin 25-də siyasətdən getdiyini elan etməsindən sonra boşalıb.
Kobaxidze ikinci dəfə partiya sədri oldu. O, ilk olaraq 2021-ci ilin yanvarından 2024-cü ilin yanvarına kimi partiyaya rəhbərlik edib.
