Aprelin 18-də İsveçrənin Sürix şəhərində hərraca çıxarılacaq nəhəng “T-Rex” (Tyrannosaurus-Rex) adlı dinozavr skeletinin 5-8 milyon İsveçrə frankı (9.3 – 14.9 milyon manat) aralığında satılacağı gözlənilir.
Busaat.az xəbər verir ki, ABŞ-dən İsveçrənin Sürix şəhərinə 9 böyük qutuda gətirilən “Trinity” adlı dinozavr skeleti Tonhalle Zürich konsert salonunda nümayiş etdirilməyə başlayıb. 3,9 metr uzunluğundakı skelet qırmızı xalçanın üzərinə qoyularaq ictimaiyyətə açılıb.
Aprelin 18-də Koller hərrac evində hərraca çıxarılacaq nəhəng dinozavr skeletinin 5-8 milyon İsveçrə frankı (9.3 – 14.9 milyon manat) aralığında satılacağı gözlənilir.
Dinozavr skeleti 2008-2013-cü illər arasında Montana və Vayominq ştatlarında qazılmış üç dinozavrın sümüklərindən ibarətdir. Satışın baş tutacağı hərrac evinin sahibi Siril Koller deyib: “Bu skelet 3 dinozavrdan ibarət olduğu üçün Trinity adlanır”.
Sümüklərin 67 milyon il yaşı olduğu bildirilir.
