Mars səfərləri astronavtların böyrəkləri üçün təhlükəli ola bilər. “Nature Communications” jurnalında dərc olunan yeni araşdırmaya görə, uzun müddətli kosmos missiyaları böyrəklərin fəaliyyətini pozur və hətta Yerə qayıtdıqdan sonra dializ ehtiyacını yarada bilər.
“ Busaat.az ” xəbər verir ki, araşdırmaya London Universitet Kollecinin (UCL) Böyrək Xəstəlikləri Departamentindən Dr. Keith Siew rəhbərlik edib.
Tədqiqat çərçivəsində Beynəlxalq Kosmik Stansiya da daxil olmaqla, 40-dan çox missiyanın məlumatları təhlil olunub.
Məlumata görə, mikroqravitasiya və kosmik radiasiya böyrəklərdə struktur dəyişikliklərinə səbəb olur. Bu dəyişikliklər kalsium və duz kimi əsas mineralların tarazlığını tənzimləyən boruların kiçilməsi ilə müşahidə olunur. Həmçinin kosmosda böyrək daşı riskinin artdığı vurğulanıb.
Dr. Siew bildirib ki, qısa müddətli missiyalarda belə böyrək sağlamlığı ilə bağlı ciddi narahatlıqlar qeydə alınıb. Alim əlavə edib ki, bu problemlərin səbəbləri tam aydın olmasa da, qarşıdakı Mars missiyaları üçün ciddi risk yaradır.
Nərmin Səmidova
