“İran nüvə silahı hazırlasa, Səudiyyə Ərəbistanı nüvə silahı əldə etməli olacaq”.
Busaat.az xəbər verir ki, bu fikri Səudiyyə Ərəbistanının baş naziri və vəliəhd şahzadəsi Məhəmməd bin Salman Əl Səud Fox News-a bildirib.
“Əgər onlar bir nüvə silahı əldə edərlərsə, təhlükəsizlik və Yaxın Şərqdəki güc balansı baxımından biz də nüvə silahı almalıyıq. Amma biz bunu görmək istəmirik”, – vəliəhd söyləyib.
Eyni zamanda, o bəzi ölkələrin nüvə silahı əldə etmək istəyinə mənfi münasibət bəslədiyini vurğulayıb.
“Bu, pis hərəkətdir. Əgər bundan istifadə etsəniz, dünyanın qalan hissəsi ilə böyük mübarizə aparmalı olacaqsınız”, – şahzadə vurğulayıb.
Martın 10-da Tehran və Ər-Riyad iki ay ərzində diplomatik münasibətləri bərpa etmək və səfirlikləri yenidən açmaq barədə razılığa gəliblər. Ər-Riyad və Tehran arasında münasibətlər 2015-ci ilin martında Səudiyyə Ərəbistanının rəhbərlik etdiyi koalisiyanın Yəməndə Ənsar Allah (Husi) hərəkatına qarşı hərbi əməliyyatına başlaması ilə kəskinləşib. 2016-cı ilin yanvarında Səudiyyə Ərəbistanının Tehrandakı səfirliyinə və onun Məşhəddəki konsulluğuna Ər-Riyadın şiə vaiz Şeyx Nimr ən-Nimri edam etməsindən qəzəblənən etirazçılar tərəfindən edilən hücumlardan sonra ölkə İranla diplomatik əlaqələri kəsib.
