“Zəngəzur dəhlizi və kommunikasiya məsələlərinin sülh sazişindən çıxarılması, sonraya saxlanılması sənədin imzalanmasının önünü açmaq üçündür”.
Bunu Busaat.az-a açıqlamasında politoloq Natiq Miri deyib.
Ekspert bildirib ki, yoxsa Azərbaycan belə bir məsələdə İrəvanla razılaşmazdı:
“Bu məsələ kimin üçün əngəlliyici amil hesab olunur? Əlbəttə ki, Ermənistan üçün. Çünki indiki vəziyyətdə sərhədlərin müəyyənləşməsi, kəndlərin qaytarılması kimi anti-Paşinyan əleyhinə istifadə olunan arqumentlər var. Onların üzərinə payızda ehtimal edilən etiraz aksiyalarını və Zəngəzur dəhlizini də əlavə etsək, bunlar Paşinyan üçün ciddi başağrısına çevrilə bilər. O baxımdan dəhliz və kommunikasiya məsələsinin sonrakı mərhələyə saxlanılması qərarı doğru və anlaşılandır”.
Həmsöhbətimiz vurğulayıb ki, bu və ya digər formada Azərbaycan və Ermənistan arasında danışıqlar davam etdirilir:
“Doğrudur, ictimaiyyət bunu görmür. Ancaq ikitərəfli kanallar açıqdır və sülh müzakirələri aparılmaqdadır”.
Natiq Miri: İkitərəfli kanallar açıqdır və sülh müzakirələri aparılmaqdadır
Onun sözlərinə görə, məzh bu danışıqların nəticə olaraq Zəngəzur dəhlizi və kommunikasiya məsələləri sülh sazişindən çıxarılıb. Müsahibimizə görə, bu o deməkdir ki, bütün əngəlləri tədricən aradan qaldırmaqla sülh sazişinin imzalanmasının önü açılır. N.Miri hesab edir ki, əslində Qərbin, ABŞ-nin istəyi də bundan ibarətdir:
“Çünki Bayden Administrasiyasının prezident seçkisinədək həm Azərbaycan-Ermənistan münaqişəsində, həm də İsrail-İran müharibəsində kiçik də olsa siyasi uğura ehtiyacı var. Vaşinqtonun sülhə bağlı çağırışlarının da məqsədi budur”.
