Zəlzələ ilə əlaqədar Suriyaya qarşı sanksiyaları müvəqqəti yumşaltmağa qərar verən Avropa İttifaqı (Aİ) Komissiyasının ilk təyyarəsi zəlzələdən zərərçəkənlərə yardım apararaq Dəməşqə çatıb.
Busaat.az xəbər verir ki, bu barədə komissiyadan açıqlama verilib.
Açıqlamaya görə, zəlzələdən zərər çəkənlər üçün qışa davamlı çadırlar, yaşayış yerləri və istilik üçün avadanlıqlar kimi yardım materialları var.
Aİ tərəfindən göndərilən yardım həm Suriya hökumətinin nəzarətində olan bölgələrdə, həm də müxalifətin fəal olduğu bölgələrdə zəlzələdən zərərçəkənlərə paylanacaq.
Yaxın günlərdə Suriyaya yardım uçuşları davam edəcək. Dəməşqə yardım Aİ-nin Dubaydakı düşərgələrindən və İtaliyanın Brindisidəki bazasından göndərilir.
Komissiyanın məlumatına görə, Suriyada zəlzələdən zərərçəkənlərə ümumilikdə 420 ton yardım materialı göndəriləcək. Təxminən 1,1 milyon avro dəyərində olan bu yardımların 225 tonu Aİ-nin humanitar yardım ehtiyatlarından qarşılanacaq.
Aİ-yə üzv ölkələr də Suriyada zəlzələdən zərərçəkənlərə yardım etmək qərarına gəliblər. AB Mülki Müdafiə Mexanizmi çərçivəsində 15 üzv ölkə Suriyaya çadır, çarpayı, ədyal, qızdırıcı, təmizlik materialları, qida və dərman yardımı edib.
6 fevral Kahramanmaraş zəlzələsindən sonra Aİ rəhbərliyi də Suriyaya 10 milyon avro dəyərində humanitar yardım göndərib.
Qeyd edək ki, Aİ administrasiyası zəlzələdən zərər çəkənlərə daha çox kömək etmək üçün Suriyaya vətəndaş müharibəsi səbəbilə 2011-ci ildən tətbiq edilən sanksiyaları müvəqqəti olaraq yumşaltmaq qərarına gəlib.
Sanksiyaların yumşaldılması ilə əlaqədar humanitar təşkilatlar Suriyada zəlzələdən zərərçəkənlərə yardım göstərmək üçün 6 ay ərzində Aİ-dən icazə istəməli olmayacaq.
