Türkiyənin milli müdafiə naziri Hulusi Akar bəyan edib ki, ölkə 70 ildən artıq müddətdə NATO üzvüdür və müttəfiqlərindən öhdəliklərini yerinə yetirəcəklərini gözləyir.
Busaat.az xəbər verir ki, Hulusi Akarın sözlərinə görə, bu öhdəliklər F-16 döyüş təyyarəsi müqaviləsi kontekstində ABŞ səlahiyyətlilərinə də aiddir.
“Biz 71 ildir NATO-nun üzvüyük, öhdəliklərimizi yerinə yetiririk və müttəfiqlərimizdən öhdəliklərini yerinə yetirmələrini gözləyirik. Ağ Evin və Pentaqonun bütün bəyanatlarına əsasən, satış məsələsi F-16-ların Türkiyəyə göndərilməsi və mövcud təyyarələrin modernləşdirilməsi müsbətə doğru irəliləyir. Ancaq ABŞ Konqresindən ayrı-ayrı mənfi ifadələr var”, – deyə Akar qeyd edib.
Türkiyə müdafiə nazirinin sözlərinə görə, Ankara Vaşinqtondan və ABŞ Konqresindən F-16-larla bağlı daha balanslı yanaşma gözləyir, çünki ABŞ istehsalı olan bu qırıcıların Türkiyəyə satışı ilə bağlı qərar NATO-nun xeyrinə olacaq.
Akar əlavə edib ki, razılaşma Türkiyə tərəfini daha da gücləndirəcək, beləliklə NATO-ya da kömək edəcək.
