Niderland Krallığında fəaliyyət göstərən Niderland-Azərbaycan “Odlar Yurdu” Cəmiyyəti ölkəmizin sülh səylərinin dərk edilməsi və dəstəklənməsi ilə bağlı bəyanatla çıxış edib.
Bu barədə Busaat.az-a Diasporla İş üzrə Dövlət Komitəsindən bildirilib.
BMT-nin Cenevrədəki nümayəndəliyinə ünvanlanan bəyanatda bildirilib ki, azərbaycanəsilli niderlandlılar Ermənistanda mövcud olan revanşist əhvali-ruhiyyəli qüvvələrin və erməni diasporunun yolverilməz əməlləri nəticəsində Cənubi Qafqaz regionunda yaranmış mövcud vəziyyətdən dərin narahatlıq hissi keçirirlər.
Bəyanatda 30 il ərzində Ermənistanın işğalçı siyasəti nəticəsində Azərbaycanın Qarabağ bölgəsinin xarabalığa çevrildiyinə və 2020-ci ildə baş vermiş müharibədən sonrakı aktual problemlərin həll olunmadığına diqqət cəlb edilib. Ermənistan silahlı qüvvələri tərəfindən döşənmiş minalar nəticəsində indiyədək 300-dən çox günahsız Azərbaycan mülki vətəndaşının və hərbi qulluqçusunun həlak olduğu və yaralandığı, regional əməkdaşlığa sadiqliyini qonşu Gürcüstanın timsalında sübut edən Azərbaycanın beynəlxalq hüquqa uyğun olaraq öz ərazilərində, o cümlədən nəqliyyat-kommunikasiya yolları üzərində suverenliyini qorumağa çalışdığı, Xankəndi-Laçın yolunun açıq olduğu kimi faktlar bir daha yada salınıb.
“Odlar Yurdu” Cəmiyyəti beynəlxalq təşkilatları bu kritik və önəmli mərhələdə erməni yalanlarına inanmamağa, Qarabağ bölgəsində irimiqyaslı bərpa-yenidənqurma layihələri həyata keçirmək məqsədilə çoxmilyardlı sərmayələr yatıran Azərbaycanın sülhsevər mövqeyini əməli şəkildə dəstəkləməyə və tərəflər arasında konstruktiv dialoqun təşkilinə yardım göstərməyə çağırıb.
